રાઇ/રાયડાનું દુનિયામાં વધુમાં વધુ ઉત્પાદન કરતો દેશ કેનેડા છે. ભારતમાં સૌથી વધુ રાયડાનું ઉત્પાદન ઉત્તર પ્રદેશમાં થાય છે અને ત્યાર પછી રાજસ્થાન, મધ્ય પ્રદેશ, હરિયાના, પંજાબ ગુજરાત અને મહારાષ્ટ્રાનો સમાવેશ થાય છે. આ પાકમાં રાઇની માખીની ઈયળ ઉપરાંત મોલો અને રંગીન ચૂસિયાંથી નુકસાન થતુ હોય છે. પાકમાં રાઇની માખીનો ઉપદ્રવ પાકની શરુઆતની અવસ્થાએ આવતો હોવાથી આ ઇયળ માટે સવિષેશ કાળજી રાખવી જરુરી છે. ઇયળો ઘેરા લીલાસ પડતા કાળા રંગની હોય છે અને તેના ઉદર પ્રદેશ પર આઠ જોડ પગ ધરાવે છે. આની ઈયળને અડકતાં ગુચળુ વળીને જમીન પર પડી જઈને મરી ગયાનો ઢોંગ કરે છે. રાઇનો પાક ૧૫ થી ૨૦ દિવસનો થાય ત્યારથી આ જીવાત પાનમાં ગોળાકાર કાણાં પાડીને નુકસાન કરે છે. પાનની નીચેની બાજુએ એક કરતા વધારે ઇયળો જોવા મળે છે. કેટલીક વખત ઉપદ્રવ વધુ હોય તો નાના છોડ પાન વગરના થઇ જાય છે. આવા સંજોગોમાં ફરીથી વાવણી કરવાની જરુરીયાત ઉભી થાય છે. આ ઇયળ રાઇ ઉપરાંત મૂળા, મોગરી અને અસાળિયા જેવા પાકને પણ નુકસાન કરતી હોય છે.