नवी दिल्ली: खाद्य पिकांमध्ये जीएम वाणांना देशात परवानगी नाही. मात्र हरियाना राज्यात एका शेतकऱ्याच्या शेतात बीटी वांग्याची लागवड आढळून आली आहे. केंद्र सरकारच्या प्रयोगशाळेतील तपासणीत या शेतकऱ्याच्या शेतातील वांगी पिकामध्ये कीड नियंत्रणासाठी जनुकीय अभियांत्रिकी प्रक्रियेद्वारा ‘जीवाणू-प्रथिन’ घातले असल्याचे सिद्ध झाले आहे. जीएम-फ्री इंडिया संघटनच्या कार्यकर्त्यांनी ही बाब जनुकीय अभियांत्रिकी संमती समिती (जीईएसी) तसेच हरियाना सरकारच्या निदर्शनास आणून दिली. हरियानातील ही जीएम वांग्याची लागवड अवैध ठरते. पर्यावरण संरक्षण कायद्याचे हे उल्लंघन आहे. हरियाना सरकारने याबाबत चौकशी करून योग्य ती कारवाई करू, असे आश्वासन जीएम-फ्री इंडिया संघटनेला दिले आहे.