ખાદ્ય અને ગ્રાહક બાબતોના પ્રધાન રામ વિલાસ પાસવાને એક ટ્વિટમાં કહ્યું છે કે, ડુંગળીના ભાવ ઘટાડવા માટે સરકાર કટિબદ્ધ છે. તેમણે માહિતી આપી કે એમએમટીસીએ 6,090 ટન ડુંગળીના આયાતનાં સોદા કર્યા છે. ગ્રાહક બાબતોના મંત્રાલયના સેક્રેટરીએ રાજ્ય સરકારો પાસેથી ડુંગળીની માંગ અંગે પૂછપરછ કરી. તાજેતરમાં કેબિનેટે 1.2 લાખ ટન ડુંગળીની આયાતને મંજૂરી આપી હતી. એમએમટીસીએ ઇજિપ્તમાંથી 6,090 ટન ડુંગળીની આયાતના સોદા કર્યા છે, જે ટૂંક સમયમાં મુંબઈ બંદરે પહોંચશે તેવી સંભાવના છે. કૃષિ મંત્રાલયના જણાવ્યા મુજબ ઉત્પાદક રાજ્યોમાં કમોસમી વરસાદ અને પૂર ને લીધે ડુંગળીના પાકને ભારે નુકસાન થયું છે. ડુંગળીના ભાવને કાબૂમાં લેવા કેન્દ્ર સરકારે તેની નિકાસ પર સંપૂર્ણ પ્રતિબંધની સાથે 29 સપ્ટેમ્બર માં સ્ટોક મર્યાદા નક્કી કરી હતી.