रब्बी हंगामातील भेंडी पिकाची लागवड थंडी सुरु होण्यापूर्वी केली जाते. भेंडीसाठी जमिनीची निवड करताना कसदार किंवा पोयट्याची, चांगल्या निचर्‍याची जमीन निवडावी. सेंद्रिय खतांचा वापर करावा. भेंडीला उष्ण व दमट हवामान चांगले मानवते. २० ते ४० अंश सेल्सिअस तापमानामध्ये हे पीक चांगले येते. भेंडी लागवडीसाठी प्रथम जमिनीची नांगरट करून ढेकळे फोडून घ्यावीत. त्यानंतर उभ्या-आडव्या दोन कुळवाच्या पाळ्या देऊन जमीन भुसभुशीत करावी. शेवटच्या कुळवाच्या पाळीअगोदर प्रति हेक्टर २० ते २५ टन चांगले कुजलेले शेणखत टाकावे म्हणजे ते जमिनीत चांगले मिसळले जाईल. • लागवड - भेंडीची लागवड सरी वरंबा, तसेच पट्टा पद्धतीने करतात, परंतु सरी वरंबा पद्धत ही प्रचलित व अधिक उत्पादनासाठी उपयुक्त आहे. भेंडीची लागवड करताना ६० सेंमीवर सरी पडून सरीच्या दोन्ही बाजूस टोकण पद्धतीने ३० सेंमी अंतरावर लागवड करावी. लागवडीसाठी प्रति एकरी २ ते ३ किलो बियाणे वापरावे. बियाणे लागवडीनंतर भरपूर पाणी द्यावे, म्हणजे मातीच्या चांगल्या ओलाव्यामुळे उगवण चांगल्या प्रकारे होते.