शेतकरी मित्रांनो, पिकामध्ये फवारणी केल्यावर कमीत कमी ६ तासांपर्यंत पाऊस नसावा; अन्यथा पानावरील/झाडावरील कीटकनाशक धुऊन जाऊन फवारणी निष्प्रभ होते. फवारणीच्या दिवशी पाऊस येण्याची शक्यता असल्यास व फवारणी करणे आवश्यक असल्यास फवारणीच्या द्रावणामध्ये चिकट द्रव्य (स्टिकर) वापरले जावे. यासाठी उच्च दर्जाचे चिकट द्रव्य (स्टिकर/ स्प्रेडर) वापरल्यास ते औषध पानांच्या पृष्ठभागावर अत्यंत जलद पसरण्याची, चिकटून राहण्याची आणि पानांमध्ये वेगाने झिरपण्याची क्षमता वाढविते. बुरशीनाशक, कीटकनाशक, जिवाणूनाशक, तणनाशक यांच्यासोबत वापरल्याने कीटकनाशकांची क्रियाशीलता अधिक वाढत असल्याचे निष्कर्षातून सिद्ध झाले. त्यामुळे कीटकनाशक पानावर/झाडावर जास्त वेळ चिकटून राहून हलका पाऊस आल्यास धुऊन जात नाही. यामुळे पिकांवर औषधांचा परिणाम तर दिसून येतोच त्याचबरोबर खर्च देखील कमी होतो.